Vinsamlegast athugið að þetta efni er eldra en 8 ára.
Endurkomu Jóhanns R. Skúlasonar og Hnokka frá Fellskoti var vel fagnað.
Endurkomu Jóhanns R. Skúlasonar og Hnokka frá Fellskoti var vel fagnað.
Mynd / Marius Mackenzie
Fréttir 21. mars 2016

Hestaíþróttir í glæsilegri umgjörð

Höfundur: Guðrún Hulda Pálsdóttir
Vinsældir innanhússmóta á íslenskum hestum eru ávallt fyrir hendi á Íslandi, sérstaklega á snjóþungum vetrum. Hérlendis keppa atvinnu- og áhugamenn á mótaröðum sunnanheiða og norðan og þykja umgjarðir mótanna til fyrirmyndar. Í Danmörku fer fram stærsta innanhússmót íslenska hestsins ár hvert, svokallað heimsbikarmót – World Tölt.
 
Heimsbikarmót íslenska hestsins innanhúss, World Tölt, var haldið í Óðinsvéum í Danmörku síðustu helgi febrúarmánaðar. Kringum 150 keppnispör voru skráð til leiks í íþróttakeppni fullorðinna, sérstakri ungmennakeppni, ásamt því að 27 stóðhestar komu fram í sérstakri keppnissýningu. Umgjörð keppninnar hefur frá upphafi hennar þótt til eftirbreytni, keppnishöllin Arena Fyn þykir glæsilegur vettvangur fyrir slík mót, það gustar ekki á gesti sem geta notið sýningarinnar prúðbúnir en ár hvert sækja um 5.300 gestir Heimsbikarmótið. 
 
Fjölmargir íslenskir hestamenn leggja leið sína til Danmerkur þessa helgi en einnig var hægt að fylgjast með mótinu í beinni útsendingu á netinu.
 
Mótið markar upphaf keppnisársins í Evrópu og ber þar alla jafna að líta sterkustu keppnispör Norður-Evrópu auk þess sem nýjar vonarstjörnur láta á sér kræla. Þykir keppnin því gefa vísbendingar um stöðu og hestakost atvinnukeppnismanna, enn fremur sem keppnin sýnir vinsældir og styrk íslenskra hestaíþrótta á meginlandinu.
 
Endurkoma heimsmeistara
 
Mikið var um dýrðir í töltkeppni mótsins þótt sigurvegararnir, Jóhann R. Skúlason og Hnokki frá Fellskoti, hafi verið í algerum sérflokki. Jóhann og Hnokki hömpuðu heimsbikar mótsins í sjötta sinn. Þeir félagar hafa ekki komið fram opinberlega síðan þeir hömpuðu heimsmeistaratitli í tölti árið 2013 og var endurkomu þeirra vel fagnað og hlutu þeir sérstök áhorfendaverðlaun mótsins. Unn Kroghen Aðalsteinsson og Hrafndynur frá Hákoti voru í 2. sæti og Anna Björk Ólafsdóttir og Reyr frá Melabergi urðu í þriðja sæti eftir að hafa sigrað B-úrslit.
 
Titilvörn hinnar þýsku Frauke Schenzel og Óskadis vom Habichtswald í slaktaumatölti, T2, reyndist örugg. Þær leiddu keppnina frá forkeppni og höfðu yfirburði í úrslitum. Jón Stenild á Eldfara frá Langtved var í 2. sæti og Sofie Panduro á Hrein frá Votmúla 1 í því þriðja.
 
Frauke lét einnig mikið að sér kveða í fimmgangskeppni mótsins. Hún sýndi tvö hross í forkeppni og hlaut tvær hæstu einkunnir þar. Hún mætti síðan með Gust vom Kronshof í úrslit og sigraði þau. Lisa Schürger á Bassa frá Efri-Fitjum hlaut silfur og Caspar Hegardt og Oddi fra Skeppargården varð þriðji eftir að hafa sigrað B-úrslit.
 
Í fjórgangi dró til tíðinda þegar Lisa Schürger á Kjalari frá Strandarhjáleigu sigraði eftir að hafa komið þriðju inn í úrslit. Anne Stine Haugen og Muni frá Kvistum, sem leiddu keppnina, urðu að láta sér lynda 2. sætið og Helena Kroghen Aðalsteinsdóttir á Kavaler frá Kleiva varð í því þriðja.
 
Þjóðverjar ungmennameistarar
 
Ungmennakeppni heimsbikar­mótsins er með því móti að lönd keppa sín á milli í liðakeppni. Eitt keppnispar frá hverju liði keppa í sömu greinum og fullorðnir. Í ár voru fimm lönd með lið í keppninni. Í fjórgangi sigraði hin danska Kristine B. Jørgensen á Tý frá Þverá II. Danir fóru einnig með sigur af hólmi í tölti en þar var á ferðinni Sarah Rosenberg Asmussen á Jósep frá Skarði. Gull í fimmgangi fór til Noregs þegar Ingrid Marie Larsen á Dimmey frá Jakobsgården sigraði. Hin þýska Gianluca Ditolve á Halegg von Vinkona sigraði í slaktaumatölti og stóðu Þjóðverjar uppi sem sigurvegarar liðakeppninnar í lokin.
 
Stóðhestasýning í sérflokki
 
Stóðhestasýning Heimsbikar­mótsins vekur ávallt mikla lukku meðal áhorfenda. Þar koma fram nokkrir frambærilegir stóðhestar í frjálslegri sýningu til að heilla áhorfendur sem síðar velja sína eftirlætishesta. Sýningin þykir því góður kynningarvettvangur fyrir ræktunargripi.
 
Í ár tóku 27 stóðhestar þátt í sýningunni, kepptu þeir í flokkum fimmgangs- og fjórgangshesta. Heimsmeistarinn Glóðafeykir frá Halakoti, setinn af Jóhanni R. Skúlasyni, stóð uppi sem öruggur sigurvegari fjórgangshesta. Áhorfendur völdu hina dönsku Viktor frá Diisa í 2. sæti og Tívar frá Moselundgård  í það þriðja. 
 
Í flokki fimmgangshesta var spennan öllu meiri. Ungur óþekktur stóðhestur, Aron frá Møllegaard að nafni, varð eftirlæti áhorfenda. Aron er fæddur 2010 undan hæfileikahestinum Fláka frá Blesastöðum 1A, sem féll frá í fyrra, og ósýndri hryssu, Ísafold frá Tóftum, en hann var sýndur í kynbótadómi fyrst í fyrra. Kom framganga hans í Óðinsvéum honum sannarlega inn í umræðu um efnilega ræktunargripi. Ungur knapi Arons, Amalie Møller San-Pedro, hafði því ærna ástæðu til að fagna innilega að sýningu lokinni.
Ágústínus frá Melaleiti, undir stjórn Sölva Sigurðssonar, hlaut annað sæti og Lettir fra Hellesylt, setinn af Dennis Hedebo Johansen var í því þriðja.

4 myndir:

Halla tekur upp Íslenskt staðfest
Fréttir 28. mars 2024

Halla tekur upp Íslenskt staðfest

Halla Sif Svansdóttir Hölludóttir, garðyrkjubóndi og eigandi Sólskins grænmetis ...

Uppfærsla á stefnumörkun Bændasamtaka Íslands
Fréttir 27. mars 2024

Uppfærsla á stefnumörkun Bændasamtaka Íslands

Fjölmörg mál voru til afgreiðslu á nýliðnu Búnaðarþingi 2024, úr fimm nefndum, s...

Endurnýting heimil til 1. nóvember 2025
Fréttir 27. mars 2024

Endurnýting heimil til 1. nóvember 2025

Matvælaráðuneytið hefur tilkynnt um frestun á gildistöku banns við endurnýtingu ...

Horfið frá framleiðslutengdum stuðningi
Fréttir 27. mars 2024

Horfið frá framleiðslutengdum stuðningi

Fyrirkomulag landbúnaðarstuðningskerfis á Íslandi mun taka miklum breytingum ef ...

Hyggur á slátrun í haust ef leyfi fæst
Fréttir 26. mars 2024

Hyggur á slátrun í haust ef leyfi fæst

Fyrrverandi sláturhússtjóri á Vopnafirði ætlar ekki að láta deigan síga þrátt fy...

Niðurskurði lokið á fé úr Blöndudal
Fréttir 26. mars 2024

Niðurskurði lokið á fé úr Blöndudal

Niðurskurður á sauðfé frá bæjunum Eiðsstöðum og Guðlaugsstöðum í Blöndudal fór f...

Kornræktarfélag gengur í endurnýjun lífdaga
Fréttir 26. mars 2024

Kornræktarfélag gengur í endurnýjun lífdaga

Kornræktarfélag Suðurlands verður endurvakið sem viðskiptavettvangur ræktenda og...

Grípa þarf tækifærin
Fréttir 26. mars 2024

Grípa þarf tækifærin

Forseti Íslands, Guðni Th. Jóhannesson, telur að bændur eigi að leyfa sér að hor...