Mynd/Isavia/Auðunn Níelsson Fyrstu ferðamenn vetrarins sem koma til Norðurlands á vegum bresku ferðaskrifstofunnar Super Break lentu á Akureyrarflugvelli í vikunni. Alls verða 29 ferðir milli Akureyrar og Bretlands og farþegar um 4500 talsins.
Fréttir 11. desember 2018

Kærkomin innspýting í ferðaþjónustu norðan heiða

Margrét Þóra Þórsdóttir

Fyrstu ferðamenn vetrarins sem koma til Norðurlands á vegum bresku ferðaskrifstofunnar Super Break lentu á Akureyrarflugvelli í vikunni.

Flugferðirnar verða alls 29 í vetur og í hverri ferð verða sæti fyrir 200 manns. Þessi innspýting er því afar kærkomin fyrir ferðaþjónustu á Norðurlandi, eins og sást síðasta vetur.

Félagið Titan Airways sér um flugið  og notar eina af stærri vélum félagsins, Airbus A321 til verksins.

„Við erum hæstánægð með að vera komin aftur til Norðurlands fyrir fyrsta flug vetrarins,” segir  Chris Hagan, hjá Super Break í tilkynningu sem Markaðsskrifstofa Norðurlands sendi frá sér af þessu tilefni.

Fyrsta flugið var frá Exeter, einum af þeim 18 flugvöllum sem flogið verður frá í þessum 29 ferðum, en einnig verður m.a. flogið frá Inverness, Isle of Man, Jersey, Derry, Newquay og London Southend. Um 4500 ferðamenn eru væntanlegir á vegum Super Breaks frá desember og fram í mars en félagið vinnur í nánu samstarfi við Markaðsskrifstofu Norðurlands, Isavia og Titan Airways við þetta verkefni.

Heimamönnum býðst að kaupa flugsæti til Bretlands, en það skapar í fyrsta sinn tækifæri á beinum tengingum við hin ýmsu héruð Bretlands sem ekki hafa áður verið í boði.