Fréttir 05. mars 2015

Geitafjárræktarfélag Íslands fær aðild að BÍ

Vilmundur Hansen

Búnaðarþing 2015 samþykkir að Geitafjárræktarfélag Íslands fái aðild að Bændasamtökum Íslands.

Umsókn um aðild að Bændasamtökum Íslands:

Geitfjárræktarfélag Íslands óskar hér með eftir aðild að Bændasamtökum Íslands.
Geitfjárhald hefur aukist verulega á síðast liðnum árum og framleiðsla afurða af geitum jafnframt aukist og eftirspurn eftir afurðum verið meiri en framboð. Markmið GÍ er að koma sem flestum úr því að horfa á geitina sem gæludýr í það að nýta  hana sem atvinnuskapandi bústofn.

Fjölmörg tækifæri felast í aðild félagsins að Bændasamtökum Íslands. Þannig verður GÍ kleift að gerast aðili að næsta búvörulagasamingi milli ríkisins og Bændasamtakanna, auk þess veitir aðild aðgang að faglegri þjónustu, gæðastýringu og  rafrænu skýrsluhaldi.

Á síðustu 7 árum hefur bæði geitum og geitfjáreigendum fjölgað. Árið 2005 voru um 340 geitur í 48 hjörðum en nú um þessar mundir eru u.þ.b. 900 geitur í 92 hjörðum. Meðalfjöldi geita í hverri hjörð er því innan við 10 dýr, sem segir sitt um hversu litlir framleiðslumöguleikar eru fyrir hendi á hverju búi. Nokkur bú eru til sem hafa alla burði til að gefa af sér nokkurt magn afurða.

Geitin hefur jákvæða ímynd meðal þjóðarinnar m.a. í ljósi þess hve mikil hætta steðjar að hinum litla stofni íslensku geitarinnar. Það er því mjög jákvætt fyrir BÍ að taka geitina upp á arma sína með GÍ sem búgreinafélag með aðild að BÍ. Stjórnmálamenn þjóðarinnar hafa á undan förnum misserum lagt áherslu á að framtíð geitarinnar verði tryggð.

Geitfjárrækt getur verið góður stuðningur fyrir aðrar búgreinar, svo sem fyrir ferðaþjónustubændur með sölu geitaafurða (osta, mjólkur, geitakjöts), ásamt því að þessir bændur geta auðgað mannlíf í nágrenni sínu með því að leyfa ferðamönnum að klappa og kela við kiðlinga. Auk þess er kasmir geitarinnar verðmæt afurð sem gefa þarf gaum og auka nýtingu á. 

Geitfjárræktarfélag Íslands telur að geitfjárrækt eigi bjarta framtíð fyrir sér hér á landi og með góðum stuðningi frá stjórnvöldum og Bændasamtökum Íslands muni stofninn öðlast þann sess sem honum ber og geitaafurðir muni auka á fjölbreytni í fæðuframboði okkar.