Vinsamlegast athugið að þetta efni er eldra en 4 ára.
Frá keppni í slaktaumatölti. Stefan Schenzel og Óskadís í braut. Fjöldi gesta eykst stöðugt og setja Íslendingar svip sinn á svæðið og borgina, enda margir klæddir íslensku fánalitunum og hvetja sitt fólk til dáða.
Frá keppni í slaktaumatölti. Stefan Schenzel og Óskadís í braut. Fjöldi gesta eykst stöðugt og setja Íslendingar svip sinn á svæðið og borgina, enda margir klæddir íslensku fánalitunum og hvetja sitt fólk til dáða.
Mynd / BBL
Fréttir 8. ágúst 2019

Fyrstu gullin komin í hús hjá Íslendingum á HM

Höfundur: Ritstjórn

Íslendingar áttu góðan dag á Heimsmeistaramóti íslenska hestsins í Berlín í dag. Fyrstu gullin komu í hús, bæði í íþróttakeppninni og á kynbótabrautinni. Forkeppni í slaktaumatölti fór fram og var firnasterk og skemmtileg. Íslendingar áttu þar tvo fulltrúa í fullorðinsflokki og einn í flokki ungmenna.

Ásmundur Ernir Snorrason og Frægur frá Strandarhöfði voru fyrstir Íslendinga í braut, áttu góða sýningu og uppskáru í einkunn 7,03 sem lengi vel hélt þeim inni í topp tíu, en lokaniðurstaðan varð 11. sæti, semsagt sæti utan úrslita, en hugsanlega kemst hann inn í úrslitin ef einhver forfallast eða afskráir úr úrslitum.

Jakob Svavar Sigurðsson og Júlía frá Hamarsey komu svo sterk inn en þau eru helsta vopn íslenska liðsins í þessari grein. Sýningin gekk vel, þau fengu háar tölur, allt upp í 9,0 fyrir frjálsu ferðina og hæga töltið, en á bilinu 7,5 - 8,5 fyrir tölt við slakan taum, sem vegur tvöfalt. Jakob fékk 8,13 í aðaleinkunn en skömmu síðar skaust hin danska Julie Christiansen upp fyrir hann með 8,23 á Stormi frá Hemlu og svo hinn þýski Stefan Schenzel á Óskadís von Habichtswald með 8,20 þannig að Jakob endaði þriðji að lokinni forkeppni og mætir í úrslit á sunnudag þar sem reikna má með spennandi keppni, enda stutt á milli efstu hesta. Hákon Dan Ólafsson var fulltrúi íslenskra ungmenna í slaktaumatöltinu og stóð sig með prýði á Stirni frá Skriðu, sérstaklega á slaka taumnum, og það skilaði sér í B-úrslita sæti, því 7. með 6,50.

Tvö gull í gæðingaskeiði

Gæðingaskeið er ein mest krefjandi grein hestaíþróttanna, þar fara saman tækni, útfærsla og hraði, en gefnar eru einkunnir fyrir niðurtöku á skeið, skeiðsprettinn sjálfan, tíminn er mældur og svo niðurhæging af skeiði metin. Íslendingar áttu sterka fulltrúa þar en ljóst að við öfluga andstæðinga yrði að etja, ekki síst skeiðmeistarann mikla Magnús Skúlason frá Svíþjóð. Konráð Valur Sveinsson og Losti frá Ekru náðu ekki að sýna sitt besta andlit en Losti lá ekki og sá draumur því úti. Þeir Bergþór Eggertsson á Besta frá Upphafi og Teitur Árnason á Dynfara frá Steinnesi áttu hins vegar þrusu spretti í fyrri umferð og fengu báðir 8,25. Magnús og Valsa áttu í kjölfarið alveg hreint magnaðan sprett í fyrri umferð, fengu m.a. 10 fyrir niðurhægingu og 9,58 í einkunn fyrir sprettinn.

Í gæðingaskeiði eru riðnar tvær umferðir svo þarna var aðeins hálfleikur, bæði Teitur og Bergþór bættu sig í seinni umferðinni á meðan Magnús fór feikna vel af stað, en missti hryssuna upp á stökk á niðurhægingarkaflanum sem þýðir 0 í einkunn fyrir þann þátt, svo segja má að hann hafi farið allan skalann þar. Mikil vonbrigði fyrir Magnús en samanlögð niðurstaða tveggja frábærra spretta skilaði Teiti Árnasyni á toppinn, einkunnin 8,66, þremur kommum hærri en Magnús og heimsmeistartitill í höfn. Bergþór varð svo þriðji með 8,46. Þá var komið að ungmennunum og þar áttu Íslendingar tvo fulltrúa. Glódís Rún Sigurðardóttir og Trausti frá Þóroddsstöðum blönduðu sér ekki í baráttuna þar en Benjamín Sandur Ingólfsson og Messa frá Káragerði skófluðu samkeppninni upp og unnu örugglega með 7,71 í einkunn, langefst.

Góður dagur á kynbótabrautinni

Yfirlitssýning kynbótahrossa fór jafnfram fram í dag og þar var þó nokkuð um hækkanir eftir rýra uppskeru undanfarna daga. Íslendingar áttu efstu hross í fjórum flokkum af sex, Mjallhvít frá Þverholtum stóð efst í flokki fimm vetra hryssna með 8,14 sýnd af Þórði Þorgeirssyni, Eyrún Ýr frá Hásæti stóð efst í flokki sex vetra hryssna með 8,58 en hún hækkaði umtalsvert á yfirliti, sýnd af nöfnu sinni Eyrúnu Ýri Pálsdóttur og í flokki sjö vetra hryssna og eldri var það svo Elja frá Sauðholti 2 sem skaraði fram úr með 8,76, sem var jafnframt hæsti kynbótadómur mótsins. Sýnandi Elju var Árni Björn Pálsson.

Í flokki fimm vetra stóðhesta varð Hamur frá Hólabaki næsthæstur með 8,44, sýndur af Tryggva Björnssyni, en hæst dæmdi hesturinn í þessum flokki var hinn sænski Kolgrímur Grímsson frá Gunvarbyn, sýndur af Daníel Jónssyni með 8,52.

Efstur í sex vetra flokki stóð Spaði frá Barkarstöðum, sýndur af Helgu Unu Björnsdóttur, en hann hlaut í einkunn 8,61 eftir góða frammistöðu á yfirlitinu. Í elsta flokki stóðhesta áttu Íslendingar ekki fulltrúa þar sem Nói frá Stóra-Hofi forfallaðist og hæst dæmdi hesturinn þar var hinn þýski Óðinn von Habichtswald sýndur listavel af Frauke Schenzel, einkunnin 8,70. Frábær uppskera hjá Íslendingum á kynbótabrautinni og góður dagur þar.

Forkeppni í tölti á föstudag

Á morgun föstudag fer fram forkeppni í tölti, grein sem margir hafa beðið spenntir eftir, auk þess B - úrslit í slaktaumatölti og 250m kappreiðaskeið. Fjöldi gesta eykst stöðugt og setja Íslendingar svip sinn á svæðið og borgina, enda margir klæddir íslensku fánalitunum og hvetja sitt fólk til dáða. Framundan er spennandi úrslitahelgi og mikil gleði. Bændablaðið fylgist áfram með, bæði á Facebook og hér á vefnum.

 

Skylt efni: HM í Berlín 2019

Halla tekur upp Íslenskt staðfest
Fréttir 28. mars 2024

Halla tekur upp Íslenskt staðfest

Halla Sif Svansdóttir Hölludóttir, garðyrkjubóndi og eigandi Sólskins grænmetis ...

Uppfærsla á stefnumörkun Bændasamtaka Íslands
Fréttir 27. mars 2024

Uppfærsla á stefnumörkun Bændasamtaka Íslands

Fjölmörg mál voru til afgreiðslu á nýliðnu Búnaðarþingi 2024, úr fimm nefndum, s...

Endurnýting heimil til 1. nóvember 2025
Fréttir 27. mars 2024

Endurnýting heimil til 1. nóvember 2025

Matvælaráðuneytið hefur tilkynnt um frestun á gildistöku banns við endurnýtingu ...

Horfið frá framleiðslutengdum stuðningi
Fréttir 27. mars 2024

Horfið frá framleiðslutengdum stuðningi

Fyrirkomulag landbúnaðarstuðningskerfis á Íslandi mun taka miklum breytingum ef ...

Hyggur á slátrun í haust ef leyfi fæst
Fréttir 26. mars 2024

Hyggur á slátrun í haust ef leyfi fæst

Fyrrverandi sláturhússtjóri á Vopnafirði ætlar ekki að láta deigan síga þrátt fy...

Niðurskurði lokið á fé úr Blöndudal
Fréttir 26. mars 2024

Niðurskurði lokið á fé úr Blöndudal

Niðurskurður á sauðfé frá bæjunum Eiðsstöðum og Guðlaugsstöðum í Blöndudal fór f...

Kornræktarfélag gengur í endurnýjun lífdaga
Fréttir 26. mars 2024

Kornræktarfélag gengur í endurnýjun lífdaga

Kornræktarfélag Suðurlands verður endurvakið sem viðskiptavettvangur ræktenda og...

Grípa þarf tækifærin
Fréttir 26. mars 2024

Grípa þarf tækifærin

Forseti Íslands, Guðni Th. Jóhannesson, telur að bændur eigi að leyfa sér að hor...