Fræðsluhornið 18. júní 2018

Barreiros – spænskar dráttarvélar

Vilmundur Hansen

Spænski véla­framleið­andinn Barreiros Diesel S.A. var settur á laggirnar í Madrid árið 1954 af manni sem hét Eduarndo Barreiro. Fljótlega hóf fyrirtækið framleiðslu á dísilvélum í borginni Ourense í norðvesturhluta Spánar.

Framleiðslan var aukin verulega eftir að Barreiros hóf framleiðslu á vélum fyrir fólksflutninga- og vörubíla  fyrir franska bifreiðaframleiðandann Berliet, hinn tveggja hæða breska AEC, þýska Hanomag sem meðal annars framleiddi dráttarvélar og hinn þýska Vidal & Sons. Seinnaframleiddi Barreiros einnig fyrir pólska vörubílaframleiðandann FSC Star sem meðal annars voru fluttir út til Kína í stórum stíl.

Dráttarvélaframleiðsla

Á nokkrum árum tókst stofnanda fyrirtækisins að gera það að stórveldi á Spáni. Samhliða því að framleiða vélar fyrir fjölda stórra bifreiðaframleiðenda hóf Barreios framleiðslu á dráttarvélum sem báru nafn fyrirtækisins.

Eduarndo Barreiro hannaði sjálfur frumgerð fyrsta traktorsins árið 1954 og árið 1958 fóru hjólin verulega að snúast þegar spænska iðnaðarráðuneytið veitti honum leyfi og stuðning til að smíða 3000 dráttarvélar.

Barrieiros hóf fljótlega samstarf við þýska dráttar­vélaframleiðandann Rheinstahl-­Hanomag sem var gamalt og stöndugt fyrirtæki og þóttu Hanomga dráttarvélarnar öðrum fremri um miðjan sjötta áratug síðustu aldar og framleiddi um eitt hundrað þúsund dráttarvélar árið 1955.

Fyrstu Rheinstahl Hanomag Barreiros, R-350 Viñero-Frutal og R-438 Especial, litu dagsins ljós árið 1962 og sama ár voru þær til sölu í 17 löndum víðs vegar um heim.

Til að vekja athygli á framleiðslunni voru Barreiros dráttarvélarnar til sýnis á landbúnaðarsýningum víða um heim og tók þátt í margs konar samkeppnum.

Árið 1964 hófs framleiðsla á týpu sem kallaðist R-500 í Þýskalandi undir heitinu Barreiros en ári síðar var framleiðslan flutt til borgarinnar Zaragoza á Spáni.

Fjárhagserfiðleikar og yfirtaka Chrysler

Í kjölfar vaxandi velgengni á miðum og í lok sjötta áratugar tuttugustu aldarinnar færði Barreiros út kvíarnar og keypti upp ýmsa minni vélaframleiðendur og jók framleiðslu sína á ýmsum sviðum.

Þensla fyrirtækisins átti eftir að draga dilk á eftir sér því árið 1967 stóð Barreiros frammi fyrir alvarlegum fjárhagserfiðleikum. Skuldir fyrirtækisins jukust hratt áður en að bandaríski framleiðandinn Chrysler steig inn og keypti upp skuldir þess og eignaðist þar með stóran hluta í Barreiros.

Tilkoma Chrysler hleypti nýju lífi í dráttarvélaframleiðslu Barreiros á Spáni sem náði hámarki árið 1968.
Sama ár setti fyrirtækið á markað týpu sem fékk heitið Barreiros 4000 og árið eftir 5000, 5500 og 7000 týpurnar sem buðu upp á alls konar tækninýjungar hvað varðaði gírskiptingu, afl og hemlakerfi.

Árið 1970 var nafni fyrirtækisins breytt í Chrysler Barreiros og 1971 hafði heildarframleiðsla Barreiros á dráttarvélum frá upphafi náð 40.000 eintökum.

Hallar undan fæti

Undir lok sjöunda áratugs síðustu aldar fór að halla undan fæti hjá fyrirtækinu vegna þess að það náði ekki að halda í nýjustu tækninýjungar. Á þeim tíma reyndi það fyrir sér í framleiðslu á smátraktorum, meðal annars fyrir vínberjaframleiðendur.

Árið 1979 seldi Chrysler sinn hluta í fyrirtækinu til Peugeot og nýju eigendurnir hættu framleiðslu á Barreiros dráttarvélum árið 1980.

Skylt efni: Gamli traktorinn