Bærinn okkar 19. október 2017

Hjarðarfell

Gunnar tekur við af föðurbróður sínum árið 2006, síðan hefur fjósið verið stækkað og nautgripum fjölgað. Fjárfjöldi svipaður.  

Býli:  Hjarðarfell.

Staðsett í sveit:  Í Eyja- og Miklaholtshreppi á sunnanverðu Snæfellsnesi.

Ábúendur: Gunnar Guðbjartsson, ásamt foreldrum sínum, Guðbjarti Gunnarssyni og Hörpu Jónsdóttur, rekur hann félagsbú.

Fjölskyldustærð (og gæludýra): Gunnar og Sigurbjörg Ottesen, ásamt dætrum hennar tveimur, Árnýju Stefaníu, 15 ára og Ernu Kristínu, 6 ára. Smalahundurinn Týra, innihundurinn Rómeó og fjósakisan Snælda.

Stærð jarðar?  Um 3.700 hektarar ræktað land, með leigutúnum um 140 hektarar.

Gerð bús? Blandað bú, aðallega nautgriparækt og sauðfjárrækt.

Fjöldi búfjár og tegundir? 540–560 vetrarfóðraðar kindur, 120–130 nautgripir – þar af um 43 mjólkurkýr – alltof mörg hross (hagasláttuvélar), 1 hani, 10 hænur og 2 svín.

Hvernig gengur hefðbundinn vinnudagur fyrir sig á bænum? 

Dagarnir byrja og enda alla jafna á fjósverkum og gjöfum. Svo eru ýmis verk þar á milli og jafnvel á ókristilegum tímum.

Skemmtilegustu/leiðinlegustu bústörfin? Heyskapur og svo er haustið skemmtilegur tími, en allra leiðinlegast er að mála.

Hvernig sjáið þið búskapinn fyrir ykkur á jörðinni eftir fimm ár? Nýtt fjós og fleiri nautgripir, líkur á að fé muni fækka.

Hvaða skoðun hafið þið á félagsmálum bænda? Betur má ef duga skal.

Hvernig mun íslenskum landbúnaði vegna í framtíðinni? Það mun fara eftir því hvort það sé pólitískur vilji til að stuðla að öflugum landbúnaði.

Hvar teljið þið að helstu tækifærin séu í útflutningi íslenskra búvara?  Í hágæða vöru á góðu verði, því ekki keppum við í magninu.

Hvað er alltaf til í ísskápnum? Smjör, ostur, rjómi, mjólk og heimagerð sulta af einhverri gerð.

Hver er vinsælasti maturinn á heimilinu? Ærfillet í blaðlauks- og sveppasósu.

Eftirminnilegasta atvikið við bústörfin? Þegar kýrin Sletta 230 bar þremur Limosine-blendings kálfum fullfrískum. 

Svo er alveg merkilegt hvað kýr eru duglegar að bera á smaladögum.